Illum Ħadd il-Palm, jew il-Ħadd tal-Passjoni tal-Mulej. Hija l-ewwel ġurnata tal-Ġimgħa Mqaddsa li tispiċċa bit-Tridu tal-Għid (Ħamis ix-Xirka, il-Ġimgħa l-Kbira, il-Vġili tal-Għid). Dawn it-tlett ijiem huma l-quċċata taċ-ċelebrazzjonijiet tas-sena liturġika tal-Knisja.
Illum nisimgħu żewġ Evanġelji, l-ewwel wieħed ikun ipproklamat fil-purċissjoni bil-palm u jirrakkonta d-daħla trijonfali ta’ Ġesù f’Ġerusalemm, riekeb fuq felu. Il-Lhud ħasbu li Ġesù seta’ kien il-Messija mwiegħed, dak li kellu jmexxihom kontra l-ħakkiema Rumani. Iżda l-imġieba tiegħu ma kinitx ta’ dan it-tip ta’ re. Hu kien ifejjaq, iħobb, jahder, jaħfer. Hu kien Re tal-paċi.
Il-qari tal-lum għandu bħala tema l-passjoni, l-mewt u l-qawmien ta’ Ġesù. Il-kliem ta’ Ġesù fuq is-salib, ngħiduhom fis-Salm tal-lum, “Alla tiegħi, Alla tiegħi, għaliex tlaqtni?” Forsi ġieli sibna lilna nfusna f’ċirkostanzi fejn staqsejna lil Alla l-istess mistoqsija, speċjalment fi żmien ta’ tbatija. L-għotja ta’ mħabba u l-ubbidjenza ta’ Ġesù għar-rieda tal-Missier, tagħtina ħafna fuqhiex nirriflettu meta nkunu wiċċ imb’wiċċ ma’ sitwazzjonijiet li jidhru impossibbli. Matul il-ġrajja tal-passjoni, irrakuntata fl-Evanġelju ta’ San Luqa, niltaqgħu ma’ kliem u azzjonijiet ta’ maħfra. Dawn il-kliem ta’ Ġesù huma xhieda tas-Saltna ta’ Alla u aħna mistiedna li nimxu ma’ Ġesù fl-aħħar ftit tal-vjaġġ tiegħu lejn is-salib. Hemm dettalji fl-Evanġelju ta’ San Luqa, li ma nsibuhomx fl-Evanġelji l-oħra, bħad-deskrizzjoni tat-triq tas-salib u t-tislib ta’ Ġesù. Eżempju ieħor huwa fil-ġnien taż-żebbuġ, meta Ġesù jfejjaq lill-qaddej tal-qassis il-kbir li qatgħulu widnejh. Fit-triq lejn il-Kalvarju, Ġesù jiltaqa’ man-“nisa li bdew iħabbtu fuq sidirhom u jibkuh.” San Luqa biss jirrakkonta l-kliem ta’ maħfra minn fuq is-salib, u l-konverżazzjoni bejn Ġesù u l-ħalliel it-tajjeb, kliem li fihom tispikka l-ħniena ta’ Ġesù. Fl-aħħar Ġesù jagħti lilu nnifsu lill-Missier u jitlob, “Missier, f’idejk jien nerħi ruħi”. Dawn id-dettalji fl-Evanġelju ta’ San Luqa juru l-imħabba bla qjies ta’ Alla, li tasal għand dawk kollha li jduru lejh għall-għajnuna. Matul din il-ġimgħa staqsi lilek innifsek, kif qed twieġeb għal din l-imħabba u l-ġentilezza ta’ Alla. In-nies li għajtu “Hosanna” fil-bidu tal-ġimgħa, malajr biddlu l-għajta f’“sallbu.” Jien dixxiplu vera ta’ Ġesù? Jew jien bla sinsla u malajr inbiddel fhemti? Il-Ġimgħa Mqaddsa hija opportunità biex nirriflettu fuq l-offerta tas-salvazzjoni li jagħtina Ġesù, u bħall-ħalliel it-tajjeb, nitolbu, “Ġesù, ftakar fija meta tidħol fis-Saltna tiegħek”.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
