Fjamma tal-Fidi

Ħelow Tfal!

Żgur li xi darba jew oħra ltqajt jew smajt bil-kelma ‘fidi’. Fidi tfisser temmen jew ikollok kunfidenza f’persuna jew f’sitwazzjoni. Fid-9 t’Awwissu niċċelebraw il-festa ta’ Santa Edith Stein jew Santa Tereża Benedetta tas-Salib li twieldet fit-12 t’Ottubru 1891 fil-Polonja. Edith Stein kienet persuna li f’ħajjitha esperjenzat diversi tipi ta’ twemmin sakemm sabet il-Verita’ u saħħet il-fidi fiha.  Twieldet fir-reliġjon Lhudija, ta’ wieħed u għoxrin sena saret atea u meta għalqet it-tletin sena saret kattolika Rumana. Edith Stein kienet professura. Studjat, għallmet u kitbet fuq is-suġġett tal-empatija, jiġifieri kif wieħed għandu jifhem lill-oħrajn. Santa Teresa Benedetta tas-salib dan ipprattikatu mal-priġunieri sħabha fil-Kamp tal-Konċentrament tan-Nażi waqt it-Tieni Gwerra dinija.

Il-Prayer Space tal-lum jisimha: Fjamma tal-Fidi 

Għaliha għandna bżonn: 

• platt tal-karti jew kartuna taċ-ċereali 
• mudell tal-fjammi
• kuluri u markers
• pinna

Aqsam il-platt fi tnejn u żomm nofs ċirku. Dak huwa l-mudell ta’ musbieħ. Żejjen il-musbieħ kif tixtieq inti. 

Fuq kull mudell tal-fjamma ikteb jew pinġi mod ta’ kif tista’ turi empatija mal-oħrajn eż. Nisma’ lil xi ħadd li għandu bżonn jitkellem.

Imbagħad ixgħel il-musbieħ billi twaħħal il-fjamma bit-tip ta’ empatija.

Dan l-eżerċizzju jista’ jsir iktar minn darba u anke pprattikat spiss.