Aħbar mhux mistennija

L-Avventura tal-Milied

Fl-ewwel ġimgħa tal-Avvent, it-tema tal-qari waqt il-quddiesa hija t-Tama. Forsi din lilna tgerfixna u tgerfex lit-tfal ukoll. Nużaw il-kelma ‘tama’ meta nkunu nixtiequ u nisperaw li jiġri xi ħaġa, bħal pereżempju, ‘nittama li jkun temp sabiħ u nkunu nistgħu noħorġu’. Iżda tama f’Alla għandha tifsira differenti. Fl-iskrittura, tfisser li aħna għandna ċertezza f’dak li jagħmel u jgħid Alla. Irridu nafdaw fih, Alla qatt ma mar u qatt ma hu ser imur lura minn kelmtu. Aħna ċerti mill-imħabba, ħniena u maħfra tiegħu, għandna ċertezza li wara din il-ħajja nistgħu ngawduh fil-ħajja ta’ dejjem. Li jkollna tama fil-Mulej, tfisser li jkollna fiduċja sħiħa fih. L-istess bħal meta t-tfal ipoġġu jdejhom f’tagħkom biex taqsmu triq. Huma jkollhom fiduċja sħiħa fikom, li intom qed tieħdu ħsieb u se tipproteġuhom mit-traffiku li jkun għaddej. Huma għandhom fiduċja li se twassluhom fil-post fejn għandhom imorru. Hekk ukoll għandha tkun it-tama tagħna, il-fiduċja tagħna f’Alla; ma għandu jidħol l-ebda dubju f’moħħna li jpoġġi f’dubju l-preżenza ta’ Alla f’ħajjitna, li hu kollu tjieba u ħniena. Tistgħu taqraw u titolbu Salm 33 li hu dwar it-tama li għandu jkollna fil-Mulej.

Qari mill-Evanġelju skont San Luqa 1, 26-28

Imbagħad fis-sitt xahar Alla bagħat l-anġlu Gabrijel f’belt tal-Galilija, jisimha Nazaret,  għand xebba, mgħarrsa ma’ raġel jismu Ġużeppi mid-dar ta’ David. Dix-xebba kien jisimha Marija. L-anġlu daħal għandha u qalilha: “Sliem għalik, mimlija bil-grazzja, il-Mulej miegħek.”

Il-Kelma tal-Mulej
Tifħir lilek Kristu

Bl-għajnuna tal-puppets, it-tfal jirrakuntaw il-ġrajja tat-tħabbira tal-Anġlu Gabrijel.

Ħudu lit-tfal f’ħanut li jbiegħ oġġetti reliġjużi, u ħalluhom jagħżlu salib żgħir. Itolbu saċerdot ibierek dan is-salib u ħajru lit-tfal iżommu dan is-salib dejjem magħhom. Meta jkunu qed jibżgħu, jew iħossuhom waħedhom, jew imdejqa, jaqbdu dan is-salib f’idejhom biex jiftakru li għalkemm lil Ġesù ma jistgħux jarawh, hu qiegħed qrib tagħhom, u huma jistgħu jitkellmu miegħu.

Kif Alla kien dejjem mal-Madonna, hekk ukoll huwa dejjem magħna. Alla ma jitlaqna qatt. Alla dejjem iżomm il-wegħdiet tiegħu.

Meta l-anġlu deher lil San Ġużepp u qallu li l-Madonna kien ser ikollha tarbija, qallu li ismu kellu jkun Għimmanu-El, li jfisser ‘Alla magħna’. Aħna ma nistgħux naraw ir-riħ, jew l-arja, imma nafu li jeżistu. Lil Alla ma narawhx, xi drabi diffiċli nemmnu li hu qiegħed magħna. Għat-tfal din hija diffiċli wkoll. L-immaġini ta’ Alla, it-tfal jibnuha fuq ir-relazzjoni u l-mġieba tagħna l-adulti magħhom. Aktar ma nuruhom mħabba, aktar se jemmnu li Alla jħobbhom u jieħu ħsiebhom.

  1. Chrismons

Kulħadd ikollu siġra tal-Milied fid-dar, u nżejnuha sabiħ. It-tfal jieħdu gost jipparteċipaw fit-tiżjin, u anke jdendlu xi ħaġa favorita tagħhom. Matul din il-ġimgħa għinuhom jagħmlu dekorazzjonijiet għas-siġra tal-Milied. Dawn huma dekorazzjonijiet b’tifsira, bl-ingliż jissejħu Chrismons. Il-chrismons huma simboli li jfakkruna f’Ġesù.

ChrismonsNIżżel

Is-salib: Ġesù miet fuq is-salib għax iħobbna

L-ankra: bħalma l-ankra żżomm il-vapur biex ma jiċċaqlaqx u jibqa’ f’post li ma huwiex ta’ periklu, hekk ukoll, lilna Ġesù jżommna fit-triq it-tajba

Il-ħuta (ichthus): hija simbolu antik tal-insara. L-ittri tal-kelma bil-grieg, huma l-ewwel ittra tal-kliem: Ġesù, Kristu, Alla, iben, Salvatur

L-Alpha u l-Omega: huma l-ewwel u l-aħħar ittra fl-alfabett Grieg, juruna li Alla huwa kollox għalina

Il-kuruna: Ġesù huwa Re, hu jsaltan fuq is-sema u l-art

Ix-xemgħa: Ġesù huwa d-dawl tat-triq tagħna

Il-qalb: Ġesù jħobbna fuq kollox u fuq kulħadd; Ġesù dejjem jibqa’ jħobbna

L-anġlu: ifakkarna fl-Anġlu Gabrijel li qal lill-Madonna li hi kienet ser tkun il-mama ta’ Ġesù; kienu wkoll l-anġli li marru jagħtu l-aħbar lir-rgħajja li twieled Ġesù

Il-maxtura: tfakkarna li Ġesù ma twelidx f’xi palazz, imma f’post fqir, u tfakkarna li l-Madonna poġġietu f’maxtura

L-istilla: tfakkarna fl-istilla li kienet qegħda tiddi fuq il-post fejn twieled Ġesù

Il-ħatar: ifakkarna li Ġesù huwa r-ragħaj it-tajjeb, li dejjem jieħu ħsiebna

  • Logħba ta’ Hide and Seek … nistaħbew kemm nistaħbew tajjeb, Alla dejjem ikun jaf fejn qegħdin!
  • Sibu l-kliem (sibu hawn taħt)
Sib il-kelmaNiżżel

Ġesù, aħna nafu li inti tħobbna ħafna, nafu li inti dejjem magħna, imma nsibuha diffiċli li nifhmu kif inti qiegħed magħna meta aħna ma nistgħux narawk. Aħna rridu nibqgħu nitgħallmu, biex insiru nafu aktar fuqek u nkunu ħbieb tiegħek. Ġesù aħna rridu nsiru bravi bħalek.

Ammen.

Niżżel u pprepara minn hawn taħt:

EliżabettaNiżżel
MarijaNiżżel

Attività l-1 Ġimgħa

  • Araw il-video ta’ kif tagħmel il-lapbook u għamluh
  • Printout tat-templates li għandkom bżonn għal din il-ġimgħa u aqtgħuhom
  • Agħtu l-kulur lill-maxtura u waħħluha fuq quddiem. Iddekoraw il-faċċata ta’ quddiem (tistgħu tużaw il-kartonċina biex tagħtu xi kliem li jista’ jkun hemm fuq il-folder mixtri)
  • Agħtu kulur l-ewwel xemgħa, vjola u fuqha iktbu l-kelma TAMA. Waħħluha fl-ewwel paġna (ix-xemgħa l-oħra tintuża fit-tieni ġimgħa)
  • Itwu l-pocket u l-forma b’2 flaps
  • Aqtgħu 2 forom ta’ 12×2 ċentimetru mill-kartonċin
XemgħatNiżżel
2 flaps Niżżel

Ejjew naqraw dwar l-ewwel ġimgħa tal-Avvent.

It-tema ta’ din il-ġimgħa hija t-TAMA. Ix-xemgħa hija vjola, u xi drabi nsejħula x-xemgħa tal-Profezija, li tfakkarna fil-profeti. Tafu min kienu l-profeti? Kienu rġiel u nisa, l-aktar li nsibuhom fit-Testment il-Qadim, li kienu jwasslu l-kelma ta’ Alla lin-nies, kienu jkellmuhom dwar kif kellhom jgħixu skont il-liġi ta’ Alla, kienu jwasslulhom messaġġi mingħand Alla. Il-profeti Iżaija u Mikea, it-tnejn għexu madwar 700 sena qabel it-twelid ta’ Ġesù u ħabbru it-twelid tiegħu. Tistgħu taraw x’qal Iżaija, f’dan il-video.

Meta nixgħelu xemgħa fid-dlam, din tgħinna nsibu t-triq. Fid-dlam ma nistgħux naraw fejn sejrin u lanqas fejn konna. Id-dawl tax-xemgħa jgħinna naraw it-triq. L-ewwel xemgħa tal-girlanda tal-Avvent, tfakkarna li rridu nibqgħu mqajma biex inkunu lesti għat-twelid ta’ Ġesù.

Il-profeti Iżaija u Mikea, jgħinuna matul din it-triq, permezz tat-tagħlim tagħhom dwar it-twelid ta’ Ġesù. F’wieħed mill-messaġġi ta’ Iżaija, hu jħabbar min kellha tkun omm Ġesù. Hu jgħid hekk, “Għalhekk is-sinjal jagħtihulkom Sidi stess: Araw, ix-xebba titqal u tiled iben, u ssemmih Għimmanu-el.” Hu qal ukoll li Alla għad jagħżel mara li ma kinitx miżżewġa u hi tkun omm Ġesù. Qal ukoll, li wieħed mill-ismijiet ta’ Ġesù ikun Għimmanu-el, li tfisser Alla magħna. 

F’okkażjoni oħra, Iżaija tkellem dwar Ġesù, u qal, “Għax tweldilna tifel, ingħatalna iben; is-setgħa tkun fuq spallejh u jsemmuh: “Kunsillier tal-għaġeb, Alla setgħan, Missier għal dejjem, Prinċep tas-sliem.” Dawn l-ismijiet jiddeskrivulna lil Ġesù u juruna l-affarijiet kbar li kellu jagħmel. Ġesù kellu jiġi fid-dinja biex ifejjaq lin-nies u jgħallimhom. Ġesù kellu jkun re li jagħti każ tan-nies tiegħu u li jġib il-paċi lid-dinja kollha. 

It-tielet messaġġ ta’ Iżaija kien dwar il-familja ta’ Ġesù. Iżaija qal li Ġesù kellu jkun parti mill-familja ta’ Ġesse. Ġesse kien missier ir-re David. Iżaija qal ukoll li l-Ispirtu tal-Mulej ikun fuq Ġesù, u li Ġesù jkun għaref ħafna u qawwi. Ġesù kien dejjem ser jagħmel dak li kien tajjeb. Il-profeta Mikea wkoll tkellem dwar it-twelid ta’ Ġesù. Hu qal li Ġesù kellu jitwieled f’Betlehem.

Intom taħsbu li dak li qalu Iżaija u Mikea, ġara tassew?

Alla uża lill-profeti biex iwassal it-tama lill-poplu tiegħu; għalhekk aħna nħarsu l-quddiem b’tama għall-festa tal-Milied.

Din ix-xemgħa se tixgħel fid-dar

Għax Ġesù ġej dalwaqt fuq din l-art!

Il-profeti ħabbruh ilu żmien,

Huwa ġej biex jagħtina l-ħelsien.

Għażiż Mulej, f’dan l-ewwel Ħadd tal-Avvent, agħmel li dan id-dawl jiddi, hekk kif il-ġranet jiqsaru, jippreparana biex id-dawl ta’ wiċċek jiddi fuqna fil-Milied. Ammen.

  • Fil-paġna tal-ewwel ġimgħa tistgħu tiktbu din it-talba, jew tagħmlu talba tagħkom
  • Waħħlu l-pocket taħt it-talba, u fuqu iktbu: L-Avvent, żmien ta’ ferħ u tħejjija
  • Fuq it-tliet rettangoli kkuluriti iktbu tliet modi ta’ kif matul din il-ġimgħa, tistgħu twasslu t-tama lill-oħrajn, poġġuhom fil-pocket
  • Waħħlu l-forma b’2 flaps fuq ix-xemgħa. Fuq in-naħa ta’ barra, iktbu Profeta Iżaija u Profeta Mikea. Fuq ġewwa iktbu: Ejjew inħejju t-triq għall-Mulej
  • Isimgħu, Born is the King, waqt li qegħdin tagħmlu din l-attività

Dawn huma xi ideat oħra li tistgħu tinkludu fil-lapbook:

Qaddisin fl-Avvent

Tistgħu tfittxu dwar dawn il-qaddisin, fuq Bekids, fis-sezzjoni Eroj, u pprintjaw stampa tagħhom.

Kalendarju tal-Avvent

Ipprintjaw il-Kalendarju tal-Avvent u wżawh biex tgħoddu l-ġranet sal-Milied.  L-Avvent jibda l-Ħadd 27 ta’ Novembru. Kuljum agħmlu xi ħaġa biex taqsmu t-tifsira tal-Avvent fid-dar, l-iskola, jew ma’ sħabkom. Iktbu dak li tagħmlu fil-kaxxa. Dawn huma xi eżempji:

  • Għidu talba li mhux soltu tgħidu
  • Kunu ta’ għajnuna
  • Ikkontrollaw ir-rabja
  • Agħmlu xi ħaġa tajba lil xi ħadd, mingħajr ma jinduna
  • Uru paċenzja
  • Naddfu l-kamra tagħkom
  • Tbissmu lil kulmin tiltaqgħu miegħu
  • Irringrazzjaw lil Alla għall-imħabba tiegħu
  • Ġib il-paċi fost sħabek
  • Aqra l-istorja tal-Milied mill-Bibbja
  • Agħti logħob li għadkom f’kundizzjoni tajba, għall-karità
  • Għin fil-preparazzjoni tal-ikel